آزمانک: ودار

انام رزا

چہ شاہ دگ ءَ کمے پسّند کچائیں بانے کہ آئی ءِ تھتگ دارئیگ انت ءُ آسن ءِ زلپی انت۔بان ءِ پیژگاہ ءَ دار واڑے کہ آئی ءِ تہ ءَ بید ء پدوم ءُ سمات ءَ دگہ ھچ مان نیست۔
تھتگ تہ ءَ بند انت ۔ پیر مردے روتی ئیں تھت ءِ سرءَ وپتگ کہ آئی ءِ یک گورباسکے پرشتگ دگہ دارے چیر داتگ تِکہ داتگ۔
چراگے بان ءِ دیم ءَ درتکگ بلے روک نہ انت۔
ڈن ءَ چرتانی چیپ چیپانی توار انت۔
چہ دورءَ برے برے کچکے ءِ ھولاسگانی توار ھم کیت۔مگرب ءَ رند لھتے گورداگیں مرگ چمدءَ بان ءِ سرءَ چہ جھل بال بنت ءُ کورءَ آپ کن انت۔برے برے شکاری ئیں مردے ھونڈائیں سیکلے ءَ سوار انت چرئیگیں تپنگے بڈ ءَ انت ئِے￸ چمے کشک ءَ گوزان ءَ کورءَ روت۔

کماش واب ءُ آگہ انت دمانے ھُبینگ بیت ءُ پدءَ گُڑیت۔
کسانیں بْرمشے ءَ آ چماں پچ کنت۔ بلے بان سیاہ شپ انت آ چماں اینگو آنگو ترینیت ھچ میم نہ کنت۔
ھمے دمان ءَ شپیرگے ءِ توارءَ کماش جھہ سریت آئی ءِ گمانءَ پاد بْرمشے آ چہ وتی جاہ ءَ پاد کیت لٹ ءَ جک دیان ءَ دزموش کنت ءُ باکس ءَ درگیجیت ڈیلے جنت ءُ چراگ ءَ روک کنت۔ تھتگ ءَ پچ کنت ءُ ڈن ءَ سرک کنت ۔ ھچ نہ گندیت۔دروازگ ءَ تکہ دنت دمانے اوشتیت ءُ پدءَ کیت تھت ءِ سرءَ تچک بیت۔ اے رندءَ آ چراگ ءِ کشگ ءَ بے ھال بیت ۔ چراگ ءِ ٹیل ھم وتی گڑی سیمسران انت ءُ وٹ گپ گپ ءَ انت ۔دمانے ءَ رند چراگ وتی گڑی گپگ ءَ جنت ءُ مریت۔
کماش چماں بند کنت ۔ ڈن ءَ شاہ دگ ءَ لاری یے گوزگ ءِ توار بیت کماش پدءَ پاد کیت ءُ نندیت دمانے چماں دروازگ ءَ سک کنت بلے ھچ نہ گندیت ۔
پدءَ وپسیت اے رندی چماں پہ زور بند کنت کہ واب بہ کپاں بلے واب نہ کپیت پاد کیت ءُ نندیت سرجاہ ءِ چیرءَ دزموش کنت ءُ کوھنیں رودپترے کشیت کہ آئی ءِ تہ ءَ کماش ءَ وتی یکیں چک ءِ ودی بوگ ءِ رمس نبشتہ کتگ ات۔ تاکاں لیٹینیت بلے تھاری ءَ میم نہ بیت ۔
دو مادیانیں ھر چہ لوگ ءِ دپ ءِکشک ءَ گوزان ءَ آیانی پادانی تْرپ تْرپ ءِ تواراں کماش دہ دہ ءَ پاد کیت لٹ ءَ پیسر کنت ءُ روان ءَ دروازگ ءَپچ کنت۔ دروازگ ءِ دپ ءَ اوشتیت ۔چہ دوراں شاہ ءَ دگ ءَ موٹلے ءِ لینٹاں گندیت۔ اوشتیت داں موٹل گوزیت آئی ءِ لینٹ ءِ رژن ءُ توار گار بنت۔
کماش دروازگ ءَ پچی ءَ کلیت ءُ پدءَ کیت لٹ ءَ تھت ءِ گورباسک ءَ تکہ دنت ءُ تچک بیت۔

ھمے دمان ءَ گوات ءِ کولے تھتگ ءِ زلپی ءَ سُرینیت ءُ کماش گڑیت آ چہ وتی جاہ ءَ دِہ پہ دِہ ءَ جھہ سریت ءُ پاد کیت کہ دیم پہ تھتگ ءَ بہ رواں آئی ءِ پاد چیزے ءَ مان گیشیت ءُ بوستگ ءَ بُن ءَ کپیت۔
پدءَ ھر نیمگ ءَ بے تواری یے شنگیت۔