بابا نا کڑد۔ مزدک باران بلوچ

شال انا بازار اٹ میژدار اینو تینا درزی نا دوکان ءِ وغدی ملاسس۔ مزدک ہم اوڑان وغدی بننگ نا سوب ء سوج کرے تو او ہندا ورندی تس کہ کاریمک زیات اریر ہندا سوب آن مالو بریوہ کہ کاریم اس مالو اڈ الے۔ عید ہم خڑکءِ مخلوق نا پچاک وختا ٹہیفوئی تمرہ۔

مزدک ہم درزی تیان اسٹ اس، چاہ ءِ تیار کرئے تو میژدار ءِ سلاہ خلک۔ ہڑتوماک اوار توسر چاہ ءِ نوش جان کننگ ءِ بنا کریر۔ دن تو داڑے پین درزی ئسکہ ولے مزدک و میژدار نا اسے ایلو تون لگاکہ۔۔وخت وخت ارغ و چاہءِ ہم اوار نوش جان کریر۔۔ اینو ولدا میژدار پیالہءِ پیالہ نا زی آ خلننگٹی ئسکہ کہ مزدک توار کرئے ” سنگت مگہ تو سے ناءِ چا کنتنس؟“
”نہ سلاہ خلکنس تو سگ ہم مرے نے۔ نی مدام ہمو بندغ اتے سلاہ چلیسہ ہراکہ اچ کنپسہ۔“میژدار مخسہ ورندی تس۔

دا ہڑتوماک تینا مسخرہ ٹی آختہ ئسر کہ خڑک انا دکاندار بالاچ سلام بٹے۔ اودے ہم چاہ کن سلا خلکر۔۔چاہ اکن تولنگ تون پارے کہ ”بابا“ ہندانگ بنگءِ۔۔۔ بابا ہندانگ بنگءِ۔۔۔
دا بنگ تون میژدار ہم ہبکہ مریسہ سوج کرئے۔۔۔ انت بابا مگہ ہمے وار آن بار ہندانگ برو۔
بالاچ نا دا ہیتاک دنا کہ خفا تمار تو او اسے ہبس سیتون کسر ناہمو نیمہ آ خنتے سخت کرئے ہرا نیمہ آن کہ بابا ءِ بروئی ئسکہ۔

مخلوق نا ہیت تو گپ برجا ئس کہ خنار گلی نا کاٹم آن اسے جیپ ئس پاش کرے ولے اُو لاری ٹی تولوک کلو بندغ آک سادہ لیویس ٹی ئسرہ۔
لاری نا چلیفوک آ بندغ لاری آن دڑا

بابا نا لیویس ہم ایلو بندغ آتا تیان بار سادہ ئس ولے اونا بلا بالاد ،پزور آ دھڑ، پیہن و خیسن آ دروشم اودے ساڑی آ بندغ آتیان جتاو شرف سیکن کڑزیفکہ۔ جتا انگا دروشم نا دا خواجہ لاری آن دھڑنگ تون ہر اسٹ تو مہر و ملاسی اٹ جوڑ بڑ کننگٹی ئسکہ، ساڑی آ مخلوق ہم بھلو مہرو مابت سیٹ اوڑتون ملننگٹی ئسورہ۔۔۔ ہندن سما تماکہ کہ دا کل تین پہ تین تون بھلو وخت اسے آن ملیتنو۔ ہر اسٹ نا ہنداکوشست اس کہ بابا تون ملے و اونا دو تیان دروت اس ہلے۔
بلوچ و غیر بلوچ دکاندار آک ہبکہ ئئسر کہ ہڑتوما نیمہ آن عاجزی پاش خننگاکہ۔۔۔۔
ہنداڑے مخلوق نا مچی ٹی مزدک، بالاچ و میژدار نا کیب آ سلوک اسے افغان دوکاندار ئس توار کرئے ”سردار مرے تو دن مرے۔ نہ کہ فخر اس نہ پین وڈائی اس۔۔
بالاچ توار کرے، ” جی خان لالا بلکل نی راست پاسہ کہ دانا عاجزی، اصول آتا سوگوئی و نظریہ نا پختی تینا مٹ تینٹءِ۔ اندا سوب آن توبابا نا پنءِ کٹانے۔“

انداوڑ خان لالا نا سوج آن مخلوق اسے ایلو تون وڑ وڑ نا سوج کننگٹی ئسرہ دنکہ ”دا ٹی امو قبائلی سرداری آ روعب انتیہ اف؟ انتیہ دا ایلوفتیان جتا ءِ ؟،داامرو سردار ئسے دانا تب اٹ وڈائی نا ڈس اف؟ انتئے دانا سنگت آک ہم داڑان بار سادہ اریر، “

مزدک ہم ہنداڑے سلوک مخلوق نا سوج و گپاتے بننگٹی ئسکہ ، ہر سوج انا ورندی ءِ او تینے تینٹ تننگٹی ئس۔ ” اہو اہو دا امو قبائلی سردار ءِ دا کُل ان پینگون ءِ ، دانا کردار ہی دادے کُل ان پینگون کرینے ، انتیہ کہ کردار امو وخت آ جوڑ مریک ہرا وخت بندغی جون قربانی ءِ تینا تہِٹی جہہ ایتے ، اُو ہر امو قربانی کن تینا جون ءِ سیونج کے کہ ہرا بدئس پن کٹنگ ان مرے ، گُڑا امو وخت کردار نا بِنا مریک، نے سماہِ ( بابا ) پن ءِ مُچا قوم اٹ کس کٹنگ کتؤ ولہ بیرہ دا سردار کٹا ، انتہ کن ! بیرہ بیرہ تینا کردار نا سوب آن“

، بالاچ اسے آڑسندہ ئسے تون خان لالا ءِ پارے، ”نے سماہ ءِ دا امو بندغ ءِ ہرا تینا لکھی آ مار اسکان اندا قوم آکن گوہا، اُو دا تینا ذاتی آ ہُج وُ مراد آتے قربان کریسہ بیرہ دا قوم و راج و وطن ءِ گیچن کرے۔“

ہنداڑے افغان لالا ہم ئبکہ ئبکہ مزدک و بالاچ نا دروشم ءِ ہرننگٹی ئس، اُو ”بابا“ ءِ سیل کریسہ ئس، افغان ام اندا سوچ ٹی ئس کہ بندغ نا دروشم ٹی فرشتہ ئس بسونے۔ ہنداڑتونان او ہم مُون مُستی مریسہ ”بابا“ نا تون ملیسہ اونا دو آن دروت اس الک۔ داڑے دا کُل سیال آک ہبکہ ہبکہ ئسُر ، دا امرو مہر مابت اسے کہ دا کُل مخلوق عاجزی اٹ داڑتون کننگ ءِ۔

اندا وخت اُو پاس اٹ داسا کُل اندا سوج کننگٹی ئسرب ”بابا“ انتکن داڑے بسونے ، ولہ اونا سنگتاک ہیت ءِ دانگ اینگ کریسہ پاش کننگٹی الوس کہ اونا داڑے بننگ نا مسخت انت ئسکہ۔
یکدم میژدار نا دکان نا کیب آ سر مننگ تون اونا سنگت آتیان اسٹ سوج کرئے کہ میژدار ہرادے
میژدار بابا ءِ اوڑتون کاریم ارے۔
میژدار تینا پنءِ بننگ تون تینا چنکا بالاد تون مونی بس پارے۔۔ای داد اٹ لہڑی صاحب، ای داد اٹ۔۔۔خیر مرے کنا خواجہ!
داڑے ببو خواجہ نمتون کاریم اس ارے۔۔۔ لہڑی پنی آ دا ورنا میژدار ءِ اسے نیمہ آ توار کرے پارے۔۔ خواجہ بابا نا دا اسے جوڑہ سے ترک و اگڑی کروئیءِ۔۔۔ بابا ناجند داکان مست اگڑی کریسس تہ ولے سوگوئی اٹ تینے تورتنو۔