گاریں دروازگ
اکرم ارس
اجب جیڑگے ءَ کپتگاں، جیڑگ ءَ آں چی؟؟ یک برے وتا جست کت من چے جیڑگ ءَ آں! من و نہ زاناں من چے جیڑگ ءَ آں۔ پد ءَ وتا جست کت من چے جیڑگ ءَ آں بلے۔ چے ھچ!!! ھشکیں تکانسری یے، گمان بیت داں اندر ءَ رنجے ھست، گمے ھست۔ برے برے گمان بیت کہ من ءَ “Anxiety” انت۔ پد ءَ وتا وت پسہ دات کہ انا انا من ءَ Anxiety نہ انت من “Overthinking” ءِ شکاراں بلے پرچی پد ءَ ھما گپ کہ نہ زاناں چے انت من ءَ- من ءَ پد ءَ ھیال اتک کہ بوت کنت “Rumination” آسر انت من وتا چہ مانگیشتگاں نوں اے اوں گمان بیت کہ مجگی “Stress” اوں ھست منی اندر ءَ۔ واب نیاھگ ءَ انت شپ ھم بے وھد انت ھمک نیمگ ءَ تھاری انت من لیٹ کشتگاں ھاموشی ءَ سرجم ءَ کوٹی مانپوش اتگ، کوٹی ءِ پنکا ءِ توار ٹک، ٹک، ٹک من سر چست کت ٹالے سگریٹ روک کت ءُ کش ات- ھمے کہ من سگریٹ ھلاس کت پد ءَ جیڑگانی رد کتار بوت، نوں منی اندر ءِ تکانسری گیش بوان ات منی وتی اندر ءَ گار بوان ات آں یک دمانے اے ھیال اتک کہ ھچ سر نیاتکگ کلیں جیڑگانی آسر تھنا وتکشی انت- پد ءَ وتا جست کت وتکشی منی باتن ءَ آواز اتک ھو، وتکشی، وتکشی درستیں جیڑگاں ھلاس کنت من پاد اتک آں اے ساھت ءَ دگہ جیڑگ ءُ مارگ ءِ سنچ ھلاس بوتگ ات- وتی چادر زرت ءُ برز ءَ بست کہ وتا پاھو دیاں- منی کش ءِ کوٹی ءِ دروازگ ءَ توار کت داں چاراں منی جند انت چہ دراتک کوٹی ءَ منی سرا میلانک بوت منی سرا کندگ ءَ بوت انچیں برزیں گالوارے ءَ گوں ٹھک دیگ ءَ بوت- ٹھک دیان ءَ گش ایت چو چہ وت ءَ تچگ لوٹ ئے؟ آ انچو کندگ ءَ ات کہ من دل ءَ گشت نوں اے شھر ءِ درائیں مردم جھسر انت کہ اے کے انت شپ ءِ گڈی پاس ءَ کندگ ءَ انت بلے من ءَ سک بد آیگ ءَ ات ھیران ءُ ابکہ اتاں کہ منی جند منی سر ءَ کندگ ءَ ات من چے گشت کناں- آ ھاموش بوت ءُ دیراں رند- گش ایت ھاں گنوک ترا واب نیاھگ ءَ انت؟ تو مرت ئے گڑا چے بیت؟ من گشت ھچ- آ ھاموش بوت من ءَ پہ بزگی چارگ ءَ ات، دیراں پد من ءَ گش ایت اے تھنا تئی جیڑہ نہ انت بے کساس مردم اے جیڑگانی شکار انت ھمے رنگیں مارشتانی آماچ انت اسل ءَ تو تھنا اے جیڑگانی آماچ نہ ئے اے تھنا تئی جیڑہ نہ انت اے جتماعی جیڑھے، تو کہ اے سپر پاداں اڈینتگ گڑا ترا اے سپر برگی انت پد ءَ من ٹالے سگریٹ روک کت کشگ بنا کت ھمے دوتانی تہ ءَ منی جند کہ منی سرا میلانک ات دوتانی تہ ءَ گار بوت، دمانے ءَ پد منی گوانکو ءِ گھنٹی ءَ توار کت داں چاراں منی زھگ ءِ توار بندے اتکگ گشگ ءَ ات، “ابا تو کدی واتر بئے” من توار بند گوش داشت ءُ ھاموش بوتاں کہ منی گورا ھچ پسہ نیست ات من چہ جند ءَ درکپتاں وتی زھگ ءَ جیڑگ ءَ بوتاں بید من آ باریں چے مار ایت، چے پیم ردوم زوریت، چونیں جاوراں دچار بیت باریں چون ردیت ءُ مزن بیت______ دمانے ءَ رند پد ءَ منی گوانکو ءِ گھنٹی ءَ توار کت داں سنگتے ءَ توار بندے دیم داتگ ات کہ گشیت “تئی ھم رنگے ءَ وتا ابدمان کتگ، آ گوں درپشناکیں بالاد ءَ سیہ لنجی شپے ءَ دچار کپتگ واتر نیاتکگ—- پد ءَ من جیڑ ات اے کار و کرنے بیت بوھگ ءَ انت اے کار ءَ من اوں کت کناں بلے آسر چے، نوں جیڑگانی دگہ دیار گسر کپتاں اد ءَ من تھنا وت نیاں پد ءَ منی وتی گسر کپتگیں دراھیں ھمراہ گیر پیداک اتاں کسے ھست انت، کسے نیست، کسے وتی جند ءِ اندر ءَ گار انت۔ پد ءَ وتا جیڑگ ءَ بوتاں کہ من کجا اتکگاں اوشتاتگاں من وت نہ زاناں من کجا گاراں،گوانکو پچ کت ءُ من وھد چار ات شپ مٹ اتگ من ءَ سما نہ کپتگ ات مرچیگیں شپ گش ئے گیشتر تھار انت من پاد اتکاں کہ در ءَ در کپاں تھاری ات ھچ میم بوھگ ءَ نہ ات من دزموش کنگ ءَ لگ اتاں دمبرت بلے من دروازگ نہ دیست من کوکار کت کہ بیا من دست گر ات کہ من گار آں داں جتا جتائیں گالواراں منی کوٹی ءِ آتراپاں ھر نیمگ ءَ توار پیداک ات گشگ ءَ انت کہ بیا دروازگ اش انت، بیا اے نیمگ ءَ انت دروازگ ھمک نیمگ ءَ ھمے توار پیداک ات کس ءَ دروازگ پچ نہ کت تھنا توار ءَ اتاں پد ءَ ھمے توارانی تہ ءَ دگہ بازیں توارے پیداک ات ءُ گشگ ءَ اتاں بیا من ءَ دزگر ات من گاراں- درستیں توار ھوار بوان اتاں ھمک نیم ءَ بس ھمے توار پیداک ات بیا دروازگ اے نیمگ ءَ انت من بلے ھچ نہ دیست_____ من تھنا دزموش ءَ اتاں دروازگ گار ات
Add comment