من کہ نوک ھوش کت، ھرھما چیز دیست کہ یک جنگ زدیں زمینے ءِ سرا یک گونڈو ءِ گندیت اِش۔ کوکار،نعرہ،باوست،تراک،برگ،کشگ،پریات،پولانس۔
میتگے ورنا شھر ءَ وانگ ءَ اتنت،اردیں میتگ ءَ اتک انت بانکے گوما گوستگیں،دیستگیں،اِشکتگیں گپّانی کسہ اِش کت انت۔ یکّے ءَ گلام مھمد ءِ میّت کوپگ داتگ،پلانی کجام زھرشانی گوں بوتگ۔ کئے ءَ کجا آنسو گیس شیلنگ دیستگ۔ بانک کئے بوتگ۔ عطا شاد کالجے ہاسٹل ءَ چی بوتگ۔ ما اے درست اِش کتگ انت ءُ برے ملما بوتگ ایں برے اجکّہ ءُ ھیران۔
من بِھ نہ زانتگ کہ کریمہ کئے انت۔ میتگے تھا درستیں مردماں بانک کریمہ ءِ نام گپتگ ما اوں سما کتگ کہ بانک کریمہ یک زالبولے ءِ پوراھیں نام ایں۔ رندا ما سرپد بوتگیں کہ بلوچاں کریمہ ءِ نام ءِ دیما پہ پھر بانک پِر کتگ،نوں ما زانگ ءَ ایں کہ کریمہ کئے بوتگ۔
اے ھمے زمانگیں کہ میتگے برزتریں کہور ءَ بیرک ءِ بستگ۔ یک حاصیں روچے ءَ بچّکاں وتی کوپگاں سیاھیں گُدے بستگ۔ اسکول ءَ شاد باد وانگ نہ بوتگ۔ نوکیں ماھے بنداتی روچاں یک کتابے میتگ ءَ گندگ بوتگ کہ درستیں ورناھاں ونتگ،آئی ءِ پشتی تاک ءَ ما چکّیں بلوچانی نبشتگ ءُ ما اینچو زانتگ کہ اے کتاب درونت ایں ءُ دیدگ نزر ایشی ءِ شونکار ایں۔
اے زمانگ اجبیں زمانگے ات گوست ما اینچو نہ زانتگ بلے باندات سرجمی ءَ باوست کنگ بوتگ۔ انقلاب،آشوب،جنز اے درستیں گپ مئے گوشاں اِش کتگ انت۔ سرجمیں میتگ اے گپّانی ءُ باوستانی توار ءَ جکسِتگ۔
منی ھوشے مرچی ایں کریمہ ءُ زیکّ ایں کریمہ ءِ تھا تھنا یک گپّے پشتکپتگ کہ ھما انت۔ مرچی اوں من کریمہ ءَ بانک کریمہ گشاں بلے مرچی من کریمہ ءَ گیشتر زاناں۔
زی پمّن اے اجب نہ بوتگ کہ بانک کریمہ درستیں بلوچاں زانتگ،رھشونے بوتگ،توارے بوتگ۔ مرچی من بانک ءَ یات کن انت تہ پمشکہ اوں اجب بیت کہ مرچی من یک زالبولے ئے،یک بلوچے ءِ بابت ءَ باز اِشکتگ۔ مرچی اگاں من بانک کریمہ شھدگانی سرا تُپنگی کُنداک ورگ ءَ بہ دیستیں تہ سما کتگ ات کہ یک بلوچ زالبولے چوں یک جنزے ءِ رھشونی ءَ کت کنت،چوشکہ مرچی من اِشکنگ ءَ آں کہ بلوچ زالبول پدمنتگ انت،لوگ ءَ دراتک نہ کن انت،ناوانندہ انت۔
بلے ھمے گپّ زی چیا نہ بوتگ انت،زی بلوچ گیشتر پدمنتگ بوتگ،گیشتر ناوانندہ بوتگ بلے زی بلوچ مردیناں یک زالبولے پہ رھشونے ءَ قبول کتگ۔
ھیر،من مرچی اوں زمینے سرا تواناتریں آوازے،کوکارے،نعرہ ئے اش کناں تہ آ یک زالبولے ءِ دپ ءَ چہ درکئیت۔ شھدگانی سرا دیمترے مردم ءَ زالبولے گنداں۔
پدا زمانگ ءَ وتی گام مٹّ نہ کت انت بلکیں وتی رپتار برجاہ داشت۔ بلے سواس جتا بوت انت۔ بازیں سواسے شھدگانی سرا کپت،بازینے تھاریں کوٹیاں،بازیں دگہ دمگے ءُ بازینے دگہ ملکے۔ اے سواسانی تھا بدلی جتائیں چیزے ات کہ اِیدا چہ ھاموشی ءَ مانشانت،وسّریں ھاموشی ءِ ات۔۔۔ دگہ مدّتے گوست اے ھاموشی پدا کوکار ءَ لگّیت،مرچی اے کوکار جھل انت بلے توار کن انت۔
ھمے ھاموشی ءِ دورانیہ ءَ درونت ءِ سواس دور دئیگ بوت انت،چگل دئیگ بوت انت۔ میتگ ءَ درونت تھنا یک کسھّے ات کہ پشکپت۔ داں مرچی دگہ ھچّی نہ گواہیت تھنا درونت ءِ گڈّی تاک کہ آ میتگے تھا کنڈ کنگ بوت،بار دئیگ بوت۔ اگاں مرچی است بیت تھنا یک رمیز وارتگیں تاکے کہ درونت نبشتہ انت۔
بانک بار وَ نہ گِپت بلے باز ءَ بیھال کت۔ باز ءَ شِگان جت۔ باز ءَ گلاک گِپت۔ بانک است ات کوکار ءَ ات،داں اے کوکار 2020 ءِ دسمبر ءَ ھلاس بوت۔
مارشت انچیں چیزے کہ توامیں جاورانی تھا وتی پوشاکاں چگل نداں۔ بانک کہ شُت دلاں گریوگ بِنا کت۔ سھبے ھپت بجا من کہ واب ءَ بست کت کوٹی ءَ سنگتے وابی ایں چمّاں منا ھال دئیگ ءَ ات ”بانک کُشگ بوتگ“۔ زمستانی سھب ءَ چمّاں پہ پچ بوھگ ءَ آپ نہ لوٹ اِت۔
زندمان برجاہ انت۔ نوک ھوش گپتگیں ءُ پدا رُستگیں مردمے ءِ چپّ ءُ چاگرد ءَ ھما جاور انت کہ دہ، پانزدہ سال پیش ءَ بوتگ انت،نوں بلے آ بانک کریمہ ءِ نوکیں کسّہ اِش کنگ ءَ نہ انت،بانکے نوکیں کوکار گار انت۔
من بلے وتی زندگی ءِ اوّلی نماز جنازہ ونتگ ات تہ آ غائبانہ نمازِ جنازہ ئے ات،ماڈل ءِ گراؤنڈ ءَ بوتگ ات ءُ آ بانک کریمہ ءِ جنازہ ات۔
بانکے ھمرائی ءَ گوستگیں کسّھانی تھا یک کسّھے فدا چارراہ ءِ بوتگ۔ ھمے چارراہ ءِ میان ءَ کوکاراں کسّہ آران کتگ۔
مرچی من پدا،فدا چارراہ ءِ آتراپاں گشت کن آں،کوکار،دموکّائیں جنین،نعرہ،گریوگ،درست گِنداں بلے بانک ءَ نہ گِنداں۔ سما بیت بانک ءِ کوکار ایڈوکیٹ گلّی ءَ وتی تھا کتگ انت ءُ نوکیں سیاست ءَ جزبگ دئیگا انت۔
مرچی ئیں نوک گام جنانیں سیاست بانک ءَ بیھال کت نہ کنت بلے درونت ءَ مرچی کئے زانت اے جیڑگی گپّے۔ چشکہ بالاچ کوہِ مراد ءَ کل بوت منا یات اتک الیاس نزر نامیں ورناھے اوں ھمے کتار ءَ بار دئیگ بوتگ ات۔
زمانگے سیاست ھلاس بوتگ ات تہ لھتیں سالاں ما تھنا ھمے زانگے پٹّ ءُ پول ءَ اتیں کہ اِشتاپی کئے بوتگ،اشتاپکاری کئے ءَ کتگ،جزباتی کئے بوتگ،کئے ءَ سیاست نہ زانتگ،کئی سیاسی طریقہ رد بوتگ۔ ممکن ایں مئے ھمے پسّو آں مرچی پِدا چارراہ بِداں ءُ پہ تُرندی بداں۔
بلے مرچی بلوچ سیاست نوک نہ انت،ریاست ءَ اوں زانت،تاگت ءَ اوں زانت،ردعمل اوں زانت۔ باید اِنت مرچی ایں کدم،تران،ھبر باندات ءَ اے واستہ ڈسکس مباں کہ پلانی رد بوتگ،سیاست کسّ نہ زانت،اشتاپ کاری کنگی نہ انت پِلاں گُھماں۔
Add comment